टाटा मोटर्सले १३ औं च्याम्पियन जोन हेटौंडामा स्थापना गरेको छ । यातायात व्यवसायी उपभोक्ता सहकारी संस्था लि. ले मंगलबार आयोजना गरेको एक कार्यक्रममा टाटा मोटर्सका आईभी प्रमुख जयदीप मटकरले च्याम्पियन जोनको उद्घाटन गरेका हुन् । सहकारीका अध्यक्ष किरण पौडेलको सभाध्यक्षतामा भएको कार्यक्रममा सिप्रद्धी अटो प्रालिका सहायक महाप्रबन्धक युवराज बुढाथोकीले यातायात व्यवसायीलाई टाटा मोटर्सका स्पेयर पार्टस् सहज र सरल रुपमा उपलब्ध गराउन च्याम्पियन जोनको अवधारणा अघि सारेको बताए ।
यस अघि नेपालका बिभिन्न सहरमा १२ वटा च्याम्पियन जोन स्थापना भइसकेको र यसै आर्थिक बर्षभित्र नेपालमा ३० वटा स्थापना गर्ने योजना रहेको बुढाथोकीले जानकारी दिए । सहकारी संस्थाबाट दैनिक १८ घण्टा यातायात व्यवसायीले गुणस्तरीय स्पेयर पार्टस् सहज रुपमा खरिद गर्न सक्ने व्यवस्था मिलाइएको बताइएको छ । कार्यक्रममा नारयणी यातायात व्यवसायी संघका पूर्बअध्यक्ष गोकर्ण पराजुलीले अटो हवको रुपमा रहेको हेटौंडामा ८० प्रतिशत टाटा कम्पनीका सवारीसाधन चलिरहेको भएपनि स्पेयर पार्टस् सहज रुपमा उपलब्ध हुन नसकेको बताए ।
सहकारीले एक दसकदेखि यातायात व्यवसायीलाई मिसावटरहित पेट्रोलियम, गुणस्तरीय मोटर पार्टस् उपलब्ध गराउँदै आएको बताए । सहकारीले वार्षिक २ करोड ५० लाख रुपैयाँभन्दा बढीको मोटर पार्टस् बिक्री गरिरहेको सहकारीका अध्यक्ष पौडेलले बताए । नेपालमा ६ सय भन्दा बढी मोटरपार्टस् बिक्रेता र २ हजार भन्दा बढी टाटा कम्पनीका सवारीसाधन मर्मत गर्ने मेकानिक्स छन् । कार्यक्रममा सिप्रद्धीले टाटा गुरु गणेश बानियाँ, रमेश थिङ र बाबु स्याङ्तानलाई उपहार सहित सम्मान गरेको थियो ।
Download