सिप्रदी र ट्राफिक प्रहरीको 'सुरक्षित सडक' अभियान शुरु
03 October 2018
काठमाडौं । टाटा मोटर्सको नेपालका लागि एकमात्र आधिकारिक वितरक सिप्रदी ट्रेडिङ प्रालि र महानगरीय ट्राफिक प्रहरी महाशाखाको सहकार्यमा “सुरक्षित सडक“ अभियान सुरु भएको छ । सडक सुरक्षा तथा सवारी सम्बन्धि बृहत ज्ञान प्रदान गरी सडक दुर्घटना न्यूनिकरण गर्ने लक्ष्यका साथ असोज ११ गतेका दिन देखि राजधानीमा सुरक्षित सडक अभियान सुरु गरेको हो । अभियानको पहिलो चरणको कार्यक्रम चापागाउँ लेलेबाट शुरु गरिएको थियोे ।
उक्त कार्यक्रममा चापागाउँ लेलेका १०५ जना टिपर चालकहरुलाई ललितपुर ट्राफिक प्रहरी महाशाखा प्रमुख इन्स्पेक्टर सिताराम हाछेथु, सिप्रदीका इन्जिनियर, तालिम प्रबन्धक र महानगरीय ट्राफिक कार्यालयका प्रतिनिधिद्वारा व्यवहारिक विषय वस्तुमा आधारित सडक सुरक्षा तालिम दिई जानकारी गराईएको थियो ।कार्यक्रममा उपस्थित ट्रक-टिप्पर चालक, व्यवसायी, यातायात कर्मचारीसम्पूर्ण ग्राहकलाई धन्यबाद दिदै सिप्रदी ट्रेडिङ प्रालिका प्रमुख कार्यकारी अधिकृ राजनबाबु श्रेष्ठले आफु नाडाको तर्फबाट सडक सुरक्षा र वातावरणको प्रतिनिधित्व गर्दै आउने दुई वर्षको योजनामा काम भैरहेको जानकारी गराएका थिए ।
'सडक सुरक्षा केवल ट्राफिक र सरकारको मात्र नभई सबैले जान्ने, बुझ्ने र अपनाउनु पर्ने कुरा हो र यस सडक सुरक्षासंग सम्बन्धित विभिन्न योजना र कार्यक्रम नेपाल सरकार, महानगरीय ट्राफिक प्रहरी महाशाखा र नाडा अटोमोबिल्स एशोशियसन अफ नेपाल (नाडा) संग सहकार्य आउने दिनहरुमा गर्दैछौ', श्रेष्ठले भने । कम्पनीले यस अभियानका आगामी चरणका कार्यक्रम राजधानीलगायत देशभरि विभिन्न स्थानमा गर्ने जनाएको छ ।